شاعر مجهول – مـُـعَـلّـقَـةْ الـراتـب

مانـي متابع للسيـاسة والأخبــار          ولا همـني أوباما ولافوز ماكـــيـن

ولا همني وش قال حسني وبشار        وما همني لو زادوا الهند والصين

وما همني لو سوق الأموال منهار       وماهمني لو كان خسروا ملايـين

ماهمني الا راتبي ذا الشهر طــار        كله صرفته يوم خمسة وعشرين

بعثرت مدخولي على يمين ويسـار       وقعدت وعيالـي نصفّـق بـكفــين

و 1300 عـلـى طـــول فــ إيــجــــار   و400 مصروف جوال في زين

و 1150 في شــركـــة إعـــمــار       قرض أخذته وشفطـوه الشياطين

و1100 تجديد وأتعـاب سـمــسار     عندي استمارة مطوفة حول عامين

و400 فــاتــورة المــاء والأنـوار    حـتـى ولـو كـنّـا للأنــوار مـطـفـيـن

وأمــا 800 بـســوي بها الــكــار     سـيارة جـربـا ثــلاث وثــمـانـيــن

لا شـمـة الراتـب يجـيها كـما الزار      تنـفض مكيـنتها كما نـفض بوكليـــن

وام العيال تـصـيح يا زوجي البار      هذا الشهر عندي في القصر عرسين

احتاج انا فستان من عشرة امتـار      وأفصـله يا فـالح الـراي بـألفــــيـــن

وأخر مئة بتروح في جيب كومار       الحارس الهندي عسى فـاله الشـيـن

ويقـول ما تـكفـيـه للفـلفـل الحــار      زعلان يبغى فوقها زود خـمســـيــن

وزادت معانـاتـي مع زود الأسـعار      أصبح مثل ما قيل طاق بطاقـيــــن

أزمة مسـويها مــداهن وتــجـــــار      وراحوا ضحيتها الضعوف المساكين

منـحاش من نـار وطـبيـت في نار    ويا ويل حـظ اللي وقــع بيـن نـاريـن

وإن الجمل صابر على الضيم صبّار    وان طاح تكثر في جنوبه سكاكـين

أبديت ما في الصدر من هم واسرار     بأقولها واخلي الخافي يــبـيــــن

يا شيوخنا لا لا تغضون الأبصار         صار المواطن يشكي العسر والدين

وانتم به ادرى ياطويلين الأعمار        بالله عليكم شوفوا الوضع بالعين